കൊച്ചി: നടന് കലാഭവന് നവാസ് (51) അന്തരിച്ചു. സിനിമ ഷൂട്ടിംഗ് കഴിഞ്ഞ് ചോറ്റാനിക്കരയിലെ ഹോട്ടല് മുറിയില് എത്തി വിശ്രമിക്കുന്നതിനിടെ കുഴഞ്ഞ് വീണ് മരിക്കുകയായിരുന്നു. ഹോട്ടല്ജീവനക്കാര് വേഗത്തില് സമീപത്തുള്ള ടാറ്റ ആശുപത്രിയില് എത്തിച്ചെങ്കിലും രക്ഷിക്കാന് സാധിച്ചില്ല. ചോറ്റാനിക്കര പൊലീസ് സ്ഥലത്തെത്തി മേല്നടപടികള് സ്വീകരിച്ചു. ജൂലൈ 25 മുതല് ഹോട്ടലില് നവാസ് താമസിച്ച് വരികയായിരുന്നു. മിമിക്രിതാരം, ഗായകന്, അഭിനേതാവ് എന്നീ നിലകളിലെല്ലാം ശ്രദ്ധേയനായിരുന്നു. പ്രശസ്ത നാടക, ചലച്ചിത്ര നടനായിരുന്ന അബൂബക്കറിന്റെ മകനായി വടക്കാഞ്ചേരിയിലാണ് നവാസ് ജനിച്ചത്. മിമിക്രിയിലൂടെ കലാരംഗത്തെത്തി. കലാഭവനില് ചേര്ന്നതോടെയാണ് പ്രശസ്തിയിലേക്കുയര്ന്നത്. സിനിമകളിലും ടെലിവിഷന് പരമ്പരകളിലും ശ്രദ്ധേയ വേഷങ്ങള് അവതരിപ്പിച്ചു. 1995 ല് ചൈതന്യം എന്ന ചിത്രത്തിലൂടെയാണ് സിനിമയില് അരങ്ങേറിയത്. മാട്ടുപ്പെട്ടി മച്ചാന്, തില്ലാന തില്ലാന, മായാജാലം, ജൂനിയര് മാന്ഡ്രേക്ക്, മൈലാഞ്ചി മൊഞ്ചുള്ള വീട്, കസബ തുടങ്ങിയവയാണ് പ്രധാന ചിത്രങ്ങള്. നവാസിന്റെ സഹോദരന് നിയാസ് ബക്കറും അറിയപ്പെംടുന്ന ടെലിവിഷന്, ചലച്ചിത്ര താരമാണ്. ചലച്ചിത്രതാരമായിരുന്ന രഹനയാണ് ഭാര്യ. മക്കള്: നഹറിന്, റിദ്വാന്, റിഹാന്. പ്രകമ്പനം എന്ന സിനിമയുടെ ഷൂട്ടിങ്ങിനായിട്ടാണ് നവാസ് ചോറ്റാനിക്കരയില് എത്തിയത്.
- Advertisement -